އެންމެންގެ މޫނުމަތިންވެސް ފެންނަމުން ދިޔައީ ހާސްކަމާއި، އަދި ފެންނަމުން ދިޔައީ ކޮންމެ މީހަކުވެސް ވަރަށް އަވަދިނެތި އުޅުނު މަންޒަރެވެ. ކޮންމެ މީހަކުވެސް މަސައްކަތް ކުރަމުން ދިޔައީ އެމީހެއްގެ މަސްއޫލިއްޔަތު ފުރިހަމަ އަށް އަދާކުރެވޭތޯއެވެ. އެއީ ކަމުގެ މުހިއްމުކަމުގެ އިތުރަށް، އެކަމުގެ ބޮޑުކަމުންކަމަށްވެސް ވެދާނެއެވެ. އެއީ އެންމެންވެސް އިންތިޒާރުކުރަމުން ދިޔަ ސ.އަތޮޅުމަދަރުސާގެ 2010 ވަނަ އަހަރުގެ ކާނިވަލް އަށް ތައްޔާރުވުމެވެ
.
އާދެ! އެއީ 7މޭއި 2010 ވީ ހުކުރުދުވަހެވެ. ސްކޫލުގެ ހުރިހާ މުވައްޒަފުންނާއި. ޓީޗަރުންނާއި ދަރިވަރުން އެކުވެގެން މަސައްކަތް ކުރީ ސްކޫލުގެ އަހަރީ ދުވަހާއި ގުޅިގެން ބޭއްވޭ މި ކާނިވަލް އަކީވެސް އަހަރީޝޯ ފަދައިން ކާމިޔާބު ހަރަކާތަކަށް ހެދުމަށެވެ. އެގޮތުން އެންމެން އެކުވެގެން ކުރި މިމަސައްކަތުގެ ނަތީއްޖާ ހަމަގައިމުވެސް ވަރަށް ފޮނިވެގެން ދާނެކަމާއިމެދު ޝައްކެއްނެތެވެ. ދުވަހުގެ ހަރަކާތުގެ ހުރިހާކަމެއްވެސް ނިމިގެން ދިޔައީ އެހާވެސް ފުރިހަމަކޮށެވެ. މިކަމުގެ އަލިގަދަ ހެއްކަކީ ވެހެމުންދިޔަ ބޯވާރޭގައިވެސް އެ ކާނިވަލްއަށް ރަށުގެ ގިނަ އަދަދެއްގެ ރައްޔިތުން ދިޔަކަމެވެ. ހަމައެހެންމެ ސްޓޯލްތަކަށް ޒިޔާރަތްކޮށް އެ ކުޅިވަރު ހަރަކާތްތަކުގައި ބައިވެރިވެ ލިބިތިބި މިންވަރަކުން ހަރަދުކުރިކަމެވެ. .
އެއްވެސް ޝައްކެތްނެތް ގޮތުގައި ސްކޫލެއްގައި ހިންގޭ މިފަދަ ކޮންމެ ކަމެއްވެސް ކާމިޔާބުވާނީ ބެލެނިވެރިންގެ ފުރިހަމަ އެއްބާރުލުން ލިބިގެންނެވެ. އެގޮތުން ސްކޫލުގައި ހިންގުނު މިހަރަކާތަށް ބެލެނިވެރިންގެ ވަރަށް ބޮޑު އެހީތެރިކަމަކާއި އެއްބާރުލުން ވަނީ ލިބިފައެވެ. ކުރިންވެސް ދެންނެވި ފަދައިން ވެހެމުންދިޔަ ވާރޭ ގައި އެބޭފުޅުން މަސައްކަތް ކުރަމުން ދިޔައީ ސްކޫލާއިމެދު އެބޭފުޅުންގެ ހިތުތެރޭގައި އޮށް ލޯބި ފާޅުވެގެންދާ ފަދަ ގޮތަކަށެވެ. އެހާވެސް ހަރަކާތްތެރިއެވެ. އެބޭފުޅުންގެ މިންނެއް މަސައްކަތް ސްކޫލަށް މިއަދު ވަނީ ކުރިއެރުމަށްޓަކައި އާ ހިތްވަރެއް ލިބިދީފައެވެ. .
ހުރިހާ އެންމެން އެކުވެގެން ހެދި ސްޓޯލްތަކުގެ އިތުރަށް ހުސްކުރާ ސޭލްގެނަމުގައި ވަނީ ވަރަށް ގިނަ އަދަދަދެއްގެ ތަކެތި ވިއްކާފައެވެ. މިތަކެތި ސްކޫލަށް ހަދިޔާ ކޮށްދީފައިވަނީ ޕީ.ޓީ.އޭގެ ފަރާތުންނާއި އެހެނިހެން ބެލެނިވެރިންނެވެ. މި ސޭލްއިންވެސް ސްކޫލަށް ވަނީ ވަރަށް ބޮޑުއެހީއެއް ލިބިފައެވެ. ހުސްކުރާސޭލްގެ އިތުރަށް ކޮފީޝޮޕްގެ ނަމުގައި ވަނީ ސްޓޯލްއެއް ހަދާފައެވެ. މި ސްޓޯލްއަށްވެސް ވަނީ ވަރަށް ގިނަބައެއްގެ ފުރިހަމަ ތަރުހީބު ލިބިފައެވެ. ހަމައެހެންމެ ފުޑްފެއާއެއް ތަފާތު އެތައް ބާވަތްތަކެއްގެ ކާތަކެއްޗާއެކު ވަނީ ބާއްވާފައެވެ. މިކަންވެސް ނިމިގެން ދިޔައީ ވަރަށް ކާމިޔާބުކޮށެވެ.އަދި މިކާނިވަލްގެ ތެރެއިން ދިރޭތަކެތި ރައްކާތެރި ކުރުމާ ބެހޭގޮތުން ވަނީ މީހުން ހޭލުންތެރި ކުރުމަށް މަސައްކަތް ކުރެވިފައެވެ. އެގޮތުން މައުޅުމާތު ލިބިދޭ ޕޯސްޓަރުތައް ސްކޫލުގެ އެކި ސަރަހައްދުތަކުގައި ބެހެއްޓިފައި ހުއްޓެވެ. .
ލިއުނީ އާމިނަތު ޝިފްނާ
